Кантанальны суд Санкт-Галену ў Швайцарыі 26 кастрычніка прызнаў былога байца беларускага спэцпадразьдзяленьня СОБР Юрыя Гараўскага вінаватым у гвалтоўным зьнікненьні бізнэсоўца Анатоля Красоўскага ў 1999 годзе. Суд прызначыў яму два гады пазбаўленьня волі ўмоўна.
Гэтае рашэньне прынятае паводле апэляцыі на апраўдальны прысуд 2023 году. Апэляцыйны разгляд адбыўся 22 верасьня 2026 году.
Справа таксама датычыла зьнікненьняў былога міністра ўнутраных справаў Беларусі Юрыя Захаранкі і апазыцыйнага палітыка Віктара Ганчара. Апраўданьне Гараўскага па гэтых двух эпізодах засталося ў сіле.
У 2019 годзе Гараўскі ў інтэрвію Deutsche Welle прызнаўся ва ўдзеле ў выкраданьнях трох апанэнтаў Аляксандра Лукашэнкі. Пазьней справу супраць яго разглядалі ў Швайцарыі на падставе ўнівэрсальнай юрысдыкцыі.
Міжнародная фэдэрацыя правоў чалавека (FIDH) назвала рашэньне першым прысудам за палітычныя зьнікненьні ў Беларусі, вынесеным былому супрацоўніку беларускіх сілавых структураў замежным судом. Пра вынік працэсу паведамілі таксама Reuters і швайцарскае агенцтва Keystone-SDA.
