Аляксандар Лукашэнка 28 кастрычніка падпісаў указы, якія зьмяняюць правілы працы дзяржаўнай сыстэмы відэаназіраньня і парадак абавязковай дактыляскапічнай рэгістрацыі. Пра гэта паведамілі ягоная прэс-служба і беларускія мэдыя.
Паводле апублікаваных паведамленьняў, абласныя выканкамы і Менскі гарвыканкам павінны будуць штогод абнаўляць пералікі аб’ектаў, дзе неабходна ўсталёўваць камэры відэаназіраньня.
Да арганізацыі і фінансаваньня рэспубліканскай сыстэмы маніторынгу грамадзкай бясьпекі дадаткова прыцягнуць юрыдычных асобаў і індывідуальных прадпрымальнікаў. Уладальнікаў кватэраў у шматкватэрных дамах вызваляць ад кампэнсацыі адпаведных выдаткаў рэспубліканскага бюджэту і аплаты электраэнэргіі, якую спажывае абсталяваньне сыстэмы.
Кола карыстальнікаў сыстэмы пашыраць за кошт падразьдзяленьняў Узброеных сілаў, якія займаюцца апэратыўна-вышуковай дзейнасьцю і аховай крытычна важных аб’ектаў. Камэры таксама можна будзе выкарыстоўваць для фіксацыі адміністрацыйных правапарушэньняў, зьвязаных зь бясьпекай дарожнага руху і эксплюатацыяй транспарту.
Асобны ўказ зьмяняе парадак абавязковай дактыляскапічнай рэгістрацыі, то бок дзяржаўнага збору адбіткаў пальцаў. Ён вызначае органы, упаўнаважаныя выдаваць накіраваньні на рэгістрацыю і праводзіць яе для новых катэгорыяў асобаў, а таксама ўдакладняе парадак абмену інфармацыяй паміж дзяржаўнымі органамі.
Апублікаваныя паведамленьні не азначаюць, што абавязковая дактыляскапія распаўсюджваецца на ўсіх жыхароў Беларусі. Пералік асобаў, якія падлягаюць рэгістрацыі, вызначаецца заканадаўствам.
