У Менскім гарадзкім клінічным цэнтры гінэкалёгіі ўпершыню ў Беларусі правялі апэрацыю пры глыбокім інфільтратыўным эндаметрыёзе з выкарыстаньнем флюарэсцэнтнай візуалізацыі ICG. Пра гэта 27 кастрычніка паведаміў Камітэт па ахове здароўя Менгарвыканкаму.
У пацыенткі была цяжкая форма захворваньня, якая закранула тоўстую кішку. Апэрацыю правёў расейскі хірург Аляксандар Папоў, кіраўнік аддзяленьня апэратыўнай гінэкалёгіі з анкагінэкалёгіяй Маскоўскага абласнога навукова-дасьледчага інстытуту акушэрства і гінэкалёгіі. Яму дапамагалі беларускія спэцыялісты.
Падчас умяшаньня выкарысталі ICG, мэдычны фарбавальнік індацыянін зялёны. Пад інфрачырвоным сьвятлом ён дапамагае хірургам лепш адрозьніваць тканкі і вызначаць межы пашкоджаных участкаў, што асабліва істотна пры апэрацыях паблізу кішэчніка ды іншых органаў.
Эндаметрыёз — захворваньне, пры якім тканка, падобная да сьлізістай абалонкі маткі, разрастаецца па-за яе межамі. Цяжкія формы могуць паражаць суседнія органы і патрабаваць складанага хірургічнага лячэньня.
Паводле гарадзкога камітэту па ахове здароўя, раней такую тэхналёгію ў Беларусі не выкарыстоўвалі. Апэрацыя адбылася ў межах навукова-практычнай канфэрэнцыі зь міжнародным удзелам.
Інфармацыі пра тое, калі гэты мэтад стане даступным для іншых пацыентак, у паведамленьнях крыніцаў няма.
