З 1 лістапада 2026 году ў Беларусі бюджэт пражытковага мінімуму ў сярэднім на душу насельніцтва павялічыцца з 530,37 да 535,70 рубля. Разам зь ім вырастуць некаторыя дзіцячыя дапамогі, сацыяльныя пэнсіі і даплаты да пэнсіяў.
Новыя памеры ўстаноўленыя пастановай Міністэрства працы і сацыяльнай абароны № 88 ад 19 кастрычніка. Яны будуць дзейнічаць да 31 студзеня 2027 году.
Паводле апублікаваных зьвестак, пражытковы мінімум для працаздольнага насельніцтва складзе 574,47 рубля, для пэнсіянэраў — 381,27 рубля, для дзяцей да трох гадоў — 332,62 рубля, ад трох да шасьці гадоў — 444,34 рубля, ад шасьці да васямнаццаці гадоў — 525,44 рубля.
Ад гэтых паказьнікаў залежаць асобныя дзяржаўныя дапамогі сем’ям зь дзецьмі, сацыяльныя пэнсіі, даплаты некаторым пажылым людзям, а таксама выплаты па доглядзе людзей з інваліднасьцю першай групы або асобаў старэйшых за 80 гадоў.
Агульны пражытковы мінімум павялічваецца на 5 рублёў 33 капейкі, або прыблізна на адзін працэнт. Гэта ўжо чацьвёрты яго пералік за 2026 год.
Павышэньне не азначае, што ўсе пэнсіі і дзяржаўныя дапамогі аўтаматычна вырастуць. Пералічаць выплаты, памер якіх заканадаўча прывязаны да бюджэту пражытковага мінімуму.
