26 кастрычніка Менскі абласны суд вынес прысуды тром фігурантам крымінальнай справы, зьвязанай з аб’яднаньнем ByPol. Юрыю Васілеўскаму прызначылі 17 гадоў зьняволеньня, Генрыху Агееву 21 год, Івану Балашэнку 25 гадоў. Пра гэта 27 кастрычніка паведаміў праваабарончы цэнтар «Вясна».
Фігурантам выставілі абвінавачаньні паводле шэрагу артыкулаў Крымінальнага кодэксу, у тым ліку аб дзяржаўнай здрадзе і ўдзеле ў арганізацыі, якую беларускія ўлады прызналі тэрарыстычнай. Падрабязнасьці судовага разбору і доказы абвінавачаньня публічна не раскрытыя.
Генрых Агееў, паводле праваабаронцаў, быў затрыманы ў лютым 2024 году ў акупаваным Расеяй Крыме. Пасьля ўтрыманьня ў расейскім сьледчым ізалятары яго перадалі Беларусі ў верасьні таго ж году. Юрыя Васілеўскага затрымалі ў верасьні 2025 году. Іван Балашэнка раней служыў у Вайсковай акадэміі Беларусі ў званьні падпалкоўніка.
«Вясна» называе Агеева і Васілеўскага палітычнымі зьняволенымі.
