Беларуская культурная ініцыятыва MALDZIS паведаміла 27 кастрычніка, што набыла на аўкцыёне ў Ізраілі карціну «Партрэт жанчыны» Міхаіла Кікоіна, мастака Парыскай школы, які нарадзіўся ў Гомелі.
Твор датуюць 1918–1920 гадамі. Карціна напісаная алеем на дошцы, мае авальную форму і подпіс аўтара. Яна належыць да раньняга парыскага пэрыяду творчасьці Кікоіна.
Паводле MALDZIS, грошы на набыцьцё далі Павал Данейка, Іван Шыла і мэцэнатка, якая пажадала застацца неназванай.
Ініцыятыва плянуе прадставіць карціну 7 лістапада на канфэрэнцыі TEDxUlicaMińskaWomen у Варшаве. Пасьля гэтага твор маюць намер перадаць Музэю гісторыі Гомеля ў якасьці грамадзкага падарунка. Дата фактычнай перадачы пакуль не абвешчаная.
Паводле кіраўніка MALDZIS Паўла Мацукевіча, набыцьцё зьвязанае з працай ініцыятывы па вяртаньні беларускай культурнай спадчыны. Арганізатары сьцьвярджаюць, што ў музэях Гомеля цяпер няма жывапісных твораў Кікоіна.
Міхаіл Кікоін жыў і працаваў у Парыжы, дзе быў зьвязаны з мастацкім асяродзьдзем знакамітага інтэрнату для мастакоў «Вулей».
