З 19 па 25 кастрычніка ў беларускую міліцыю паступіла больш за дзьве тысячы паведамленьняў пра званкі тэлефонных ашуканцаў. Такі вынік атрымаў «Позірк», прааналізаваўшы штодзённыя зводкі Міністэрства ўнутраных справаў.
За гэты пэрыяд міліцыя паведамляла пра затрыманьне шасьці кур’ераў, якіх зьвязвае з махлярскімі схемамі. У двух зь іх, паводле ведамства, канфіскавалі агулам больш за 100 тысяч беларускіх рублёў.
Толькі за 25 кастрычніка ў МУС паступіла каля ста паведамленьняў пра падазроныя тэлефонныя званкі. Ведамства паведаміла пра пяць зарэгістраваных за дзень злачынстваў з выкарыстаньнем інфармацыйна-камунікацыйных тэхналёгіяў.
Падобная колькасьць зваротаў назіралася і раней: з 5 па 11 кастрычніка паведамлялася пра больш за дзьве тысячы званкоў, з 12 па 18 кастрычніка пра больш за 1900.
Генэральная пракуратура Беларусі 22 кастрычніка паведамляла, што з пачатку году ў краіне зарэгістравалі больш за сем тысяч выпадкаў лічбавага махлярства, якія прычынілі грамадзянам рэальную шкоду.
Колькасьць паведамленьняў пра падазроныя званкі не азначае такую самую колькасьць завершаных махлярстваў або пацярпелых. Тым ня менш апублікаваныя лічбы паказваюць, што ашуканскія званкі застаюцца масавай праблемай.
