У Горадні затрымалі 17-гадовага юнака, якога міліцыя падазрае ў стварэньні шкоднаснай праграмы для смартфонаў з Android. Паводле паведамленьня МУС Беларусі ад 24 кастрычніка, ад яе выкарыстаньня пацярпелі больш за 120 чалавек, а агульная шкода склала каля 150 тысяч беларускіх рублёў.
Сьледзтва сьцьвярджае, што падлетак распрацаваў праграму на замову знаёмага. Яна адносіцца да тыпу траянскіх праграмаў Mamont, якія выкарыстоўваюцца для несанкцыянаванага доступу да зьвестак на тэлефоне і банкаўскіх рахункаў.
Паводле МУС, шкоднасныя файлы распаўсюджвалі праз Telegram. Атрымальнікам прапаноўвалі адкрыць нібыта фатаздымак з подпісам «Ты на фота» або відэа дарожна-транспартнага здарэньня. Пасьля ўсталяваньня праграма магла атрымліваць зьвесткі са смартфона, якія злачынцы выкарыстоўвалі для крадзяжу грошай.
Супраць затрыманага распачалі крымінальную справу паводле артыкула аб распрацоўцы, выкарыстаньні і распаўсюдзе шкоднасных кампутарных праграмаў. Расьсьледаваньне працягваецца.
Карыстальнікам Android ня варта ўсталёўваць праграмы з файлаў, атрыманых празь перапіску, нават калі паведамленьне выглядае як дасланае знаёмым чалавекам. Пры падазрэньні на заражэньне трэба зьвярнуцца ў банк, заблякаваць магчымы несанкцыянаваны доступ і праверыць тэлефон.
