Аляксандар Лукашэнка 22 кастрычніка падпісаў указы аб зьменах у кіраўніцтве Ўзброеных сілаў Беларусі. Новыя камандуючыя прызначаныя ў Сілах спэцыяльных апэрацыяў, Заходнім і Паўночна-Заходнім апэратыўных камандаваньнях.
Сілы спэцыяльных апэрацыяў узначаліў палкоўнік Уладзімер Сафонаў. Раней ён быў начальнікам штаба і першым намесьнікам камандуючага. Ягонае ранейшае месца заняў палкоўнік Дзьмітры Варашылаў.
Папярэдні камандуючы Сіламі спэцыяльных апэрацыяў палкоўнік Аляксандар Ільюкевіч прызначаны камандуючым войскамі Заходняга апэратыўнага камандаваньня. Начальнікам штаба і першым намесьнікам камандуючага гэтымі войскамі стаў генэрал-маёр Андрэй Краўчанка, які дагэтуль кіраваў упраўленьнем тэрытарыяльнай абароны і займаў пасаду намесьніка начальніка Генэральнага штабу.
Паўночна-Заходняе апэратыўнае камандаваньне ўзначаліў генэрал-маёр Аляксандар Лаўрэнаў. Раней ён быў начальнікам штаба Заходняга апэратыўнага камандаваньня.
Пра прызначэньні паведамілі прэсавая служба Лукашэнкі і беларускія мэдыя. Афіцыйныя паведамленьні не тлумачаць прычыны кожнай кадравай зьмены.
