Фэдэральны судзьдзя Амір Алі ў Вашынгтоне 28 верасьня скасаваў умовы, паводле якіх адміністрацыя Дональда Трампа магла ўтрымліваць частку фэдэральных антытэрарыстычных грантаў, калі штаты і мясцовыя ўлады не выконвалі патрабаваньні да арганізацыі выбараў.
Умовы датычыліся праграмаў FEMA аб’ёмам больш за $1 млрд. Сярод патрабаваньняў былі пераход ад некаторых электронных сыстэмаў падліку да папяровых бюлетэняў, ручны пасьлявыбарчы аўдыт, праверка грамадзянства зарэгістраваных выбарнікаў і выбарчых работнікаў. FEMA прадугледжвала ўтрыманьне 20% фінансаваньня да выкананьня ўмоваў.
Суд пастанавіў, што Кангрэс не даў FEMA паўнамоцтваў прывязваць гэтыя антытэрарыстычныя гранты да такіх патрабаваньняў у выбарчай адміністрацыі. Пазоў падалі Каламбус у Агаё, Нэшвіл і акруга Дэйвідсан у Тэнэсі, а таксама акругі Эль-Паса і Гарыс у Тэхасе.
