Каардынацыйная Рада стварыла тры новыя камісіі: Міжнародную, па рэформах і падрыхтоўцы пераходнага пэрыяду, а таксама па этыцы. Рашэньні прынятыя паводле вынікаў галасаваньня пасьля адкрытага агульнага паседжаньня 28 ліпеня.
За стварэньне Міжнароднай камісіі прагаласавалі 68 дэлегатаў, трое ўстрымаліся. Яе старшыню вызначыць другі тур: Маргарыта Ворыхава атрымала 36 галасоў, Ксенія Луцкіна — 28. Аляксандра Мамаева набрала адзін голас, яшчэ сем дэлегатаў устрымаліся або прагаласавалі супраць усіх.
Камісія павінна каардынаваць міжнародную дзейнасьць КР і разьвіваць сувязі з парлямэнтамі ды міжнароднымі арганізацыямі. Ворыхава прапануе сыстэмную каардынацыю працы КР, Офісу Сьвятланы Ціханоўскай і Аб’яднанага пераходнага кабінэту. Луцкіна робіць стаўку на парлямэнцкую дыпляматыю і практычныя пытаньні беларусаў за мяжой.
Камісію па рэформах і падрыхтоўцы пераходнага пэрыяду ўзначаліў Юры Губарэвіч, які атрымаў 54 галасы. Ягоным намесьнікам абраны Аляксандар Ракіцкі з 46 галасамі. За стварэньне самой камісіі прагаласавалі 70 дэлегатаў, трое ўстрымаліся. Яна будзе займацца законапраектамі і прапановамі для пераходнага пэрыяду, у тым ліку ў сфэрах мясцовага самакіраваньня, палітычных партыяў і рэформы сілавога блёку.
За стварэньне Камісіі па этыцы таксама прагаласавалі 70 дэлегатаў, двое ўстрымаліся. Старшынём стаў Аляксей Міхалевіч, намесьніцай — Аляксандра Дойніч. Камісія павінна сачыць за выкананьнем этычнага кодэксу і разглядаць праблемы, зьвязаныя з паводзінамі дэлегатаў і мовай варожасьці.
Стварэньне камісіяў дае новаму складу КР працоўную структуру. Наступным тэстам стане тое, ці ператворацца гэтыя органы ў пляцоўкі з вымяральнымі вынікамі, а ня толькі ў новы ўзровень унутранай бюракратыі.
